মাকুমৰ গোপালকৃষ্ণ বালিকা বিদ্যালয়ত শনিবাৰে অনুষ্ঠিত হোৱা এক গুৰু গম্ভীৰ অনুষ্ঠানত বিশিষ্ট শিশু সাহিত্যিক,অৱসৰপ্ৰাপ্ত শিক্ষক,সাহিত্য অকাডেমীৰ পৰা শিশু সাহিত্যৰ বাবে বঁটা প্ৰাপক হৰেন্দ্ৰ নাথ বৰঠাকুৰৰ ৬খন গ্ৰন্থ উন্মোচন কৰা হয় । উন্মোচন কৰা গ্ৰন্থকেইখন হল স্বনিৰ্বাচিত গীতৰ গ্ৰন্থ “মোৰ গানৰ চৰাই”,আইতাৰ মুখৰ পদ্য আৰু গীত,দোকমোকালিৰ বেলি,গীতিমালিকা,পাঁচখন শিশু নাট আৰু চিৰিয়াখানা । গ্ৰন্থ কেইখন উন্মোচন কৰে তেজপুৰ কেন্দ্ৰীয় বিশ্ববিদ্যালয়ৰ অৱসৰপ্ৰাপ্ত ভাৰপ্ৰাপ্ত উপাচাৰ্য ড°মদন শৰ্মাই । মাকুমৰ গিণি প্ৰকাশন আৰু শিৱসাগৰৰ নাট্যপীঠৰ উদ্যোগত অনুষ্ঠিত হোৱা এই অনুষ্ঠানত উন্মোচক,বিশিষ্ট শিক্ষাবিদ,লিখক ড° মদন শৰ্মাই এই পুথিকেইখনৰ সুকীয়া মূল্য আছে বুলি উল্লেখ কৰি লিখক বৰঠাকুৰক পৰিশীলিত জীৱনবোধৰ কবি,গীতিকাৰ বুলি মন্তব্য কৰে । অনুষ্ঠানত বিশিষ্ট সাহিত্যিক,মাকুমস্থিত ২য় অসম আৰক্ষী বেটেলিয়ানৰ অধিনায়ক ড°নন্দ সিং বৰকলাই শিশু সাহিত্যিক হৰেন্দ্ৰ নাথ বৰঠাকুৰে ফুল ফুলাৰ পৃথিৱীৰ বাটেৰে আমাক স্বাগতম জনাইছে বুলি উল্লেখ কৰে । তিনিচুকীয়া মহাবিদ্যালয়ৰ অৱসৰপ্ৰাপ্ত অধ্যাপক ড°জ্যোতি প্ৰসাদ চলিহাই বন্তি প্ৰজলন কৰি আৰম্ভ কৰা এই গ্ৰন্থ উন্মোচনী সভাত বিশিষ্ট লিখক পুণ্য শইকীয়া আৰু শাৰীৰিকভাবে অসুস্থ শিশু সাহিত্যিক,গ্ৰন্থকাৰ হৰেন্দ্ৰ নাথ বৰঠাকুৰেও বক্তব্য দাঙি ধৰে । অনুষ্ঠানত মাধ্যমিক শিক্ষা পৰিষদৰ অৱসৰপ্ৰাপ্ত সচিব ধন দেৱমহন্ত,অৱসৰপ্ৰাপ্ত শিক্ষক পূৰ্ণানন্দ বৰুৱা প্ৰমুখ্যে বহু কেইগৰাকী বিশিষ্ট ব্যক্তি উপস্থিত থাকে । অনুষ্ঠানটোৰ আঁত ধৰে অৱসৰপ্ৰাপ্ত প্ৰৱক্তা ৰাণা চাংমাই আৰু শিক্ষক মণজিৎ ঠাকুৰে ।
ৰন্টু বৰশইকীয়া , মাকুম ,Ne India News
