Sunday, December 4, 2022
HomeAssameseচৰকাৰী সিদ্ধান্তঃ ভাষাৰ বদান্যতা নে মাতৃভাষাৰ সংকট- ১ম খণ্ড

চৰকাৰী সিদ্ধান্তঃ ভাষাৰ বদান্যতা নে মাতৃভাষাৰ সংকট- ১ম খণ্ড

চৰকাৰী সিদ্ধান্তঃ ভাষাৰ বদান্যতা নে মাতৃভাষাৰ সংকট- ১ম খণ্ড

আমি স্কুলত নে কলেজত পঢ়া Alphonse Daudet- ৰ “The Last Lesson “- নামৰ পাঠ এটাৰ কথা মনত আছে । পাঠটিত শিক্ষক- M. Hamel – য়ে বৰ দুখেৰে কৈছিল, –

” My children, this is the last lesson I shall give you. The order has come from Berlin to teach only German in the schools of Alsace and Lorraine….. This is your last French lesson….. ”

বহু বছৰৰ আগতে আমাৰ অসমৰ স্কুলতো এদিন শিক্ষকে বাধ্যত পৰি কৈছিল ,” সৰুৰে পৰা তোক এইচোপা হে চিকালে, ছনিবাৰে ছনিবাৰে চদায় তোৰ জ্বৰ উঠে? ”

এয়া অসমীয়াৰ দুৰ্কপাল। ছশ বছৰীয়া আহোম ৰাজ্যৰ পতনৰ পিছতে বৃটিছ শাসকে আমাৰ ভাষা-সাহিত্যৰ পথটো কন্টকাকীৰ্ণ কৰি তুলিছিল।

প্ৰণিধানযোগ্য যে ১৮৭৪ চনৰ পূৰ্বে বৃটিছে অসমৰ প্ৰশাসনিক কামবোৰ – বংগ প্ৰেচিডেন্সিৰ অধীনত কলিকতাৰ পৰা চলাইছিল।

বংগৰ প্ৰশাসনিক কাম চলাবলৈ বৃটিছ চৰকাৰে স্থানীয় শিক্ষিত বঙালী লোকক নিয়োগ কৰিছিল । সেই দৰেই অসমৰ প্ৰশাসনিক কামতো বংগৰ পৰা অনা মানুহ নিয়োগ কৰিছিল।

বৃটিছে তেওঁলোকক বিশ্বাস কৰিছিল আৰু তেওঁলোকে কোৱা কথা পুনৰ বিবেচনা নকৰাকৈ গ্ৰহণ কৰিছিল।
প্ৰশাসনিক ক্ষেত্ৰত বঙালী বাবুসকলৰ সূচলতাৰ বাবে ১৮৩৬ চনৰ পৰা বৃটিছ শাসিত অসমত বঙলা ভাষাৰ জড়িয়তে কাম-কাজ চলোৱাৰ সিদ্ধান্ত লৈছিল।

১৮৩৬ চনত ৰেভিনিউ কমিছনাৰ জেনকিন্সে উদ্যোগ লৈ ‘মৰি গ’লেও অসমীয়া ভাষাৰ স্বতন্ত্ৰতা স্বীকাৰ নকৰা’ বিষয়া উইলিয়াম ৰবিনচনৰ সহযোগত স্কুল আৰু কাছাৰীৰ পৰা অসমীয়া ভাষাক বিদায় সম্বৰ্ধনা জনাইছিল।

সিদিনাও হয়তো অসমৰ স্কুলৰ কোনোবা শিক্ষকে হুমুনিয়াহ কাঢ়ি কৈছিল -” ল’ৰাহঁত, এয়া তহঁতৰ মাতৃভাষাৰ শেষ পাঠ। আজিৰ পৰা তহঁতে আৰু পৃথিৱীৰ অতিকৈ ‘শুৱলা’ ভাষাত পাঠ আওঁৰোৱাৰ পৰা বঞ্চিত হ’বি!”

কিন্তু কোনো অসমীয়াই সেই সময়ত চৰকাৰৰ ভাষা-নীতিৰ ওপৰত প্ৰশ্নৰ অৱতাৰণা কৰা নাছিল।
চিন্তাৰ উদ্ৰেক হৈছিল তেতিয়াহে, যেতিয়া অসমীয়া লোকে দেখিলে- অসমৰ খিলঞ্জীয়া সামাজিক আৰু সাংস্কৃতিক ক্ষেত্ৰখনলৈ ভাবুকি আহি পৰিল, অসমৰ জন-গাঁথনিৰো ৰূপান্তৰ ঘটিল।

ফলত অসমৰ থলুৱা ভাষা, সংস্কৃতি, অৰ্থনীতি আৰু ৰাজনৈতিক স্থিতি গভীৰ চাপ আৰু উৎকণ্ঠাৰ মাজলৈ ক্ৰমান্বয়ে গতি কৰিছিল। মুষ্টিমেয় অসমীয়া উৎকণ্ঠিত হৈছিল তেতিয়া, যেতিয়া অসমৰ সাংস্কৃতিক গতিধাৰাৰ পৰিবৰ্তন স্পষ্ট হৈ পৰিছিল।

অসমীয়া মধ্যবিত্ত শ্ৰেণীৰ চকু মুকলি কৰাত প্ৰথম ভূমিকা লয় – খ্ৰীষ্টিয়ান মিছনেৰীসকলে। মিছনেৰীসকলে ধৰ্ম প্ৰচাৰৰ বাবে আহিলেও ভাষাতত্বৰ ওপৰত গভীৰ জ্ঞান থকা নাথান ব্ৰাউনে অসমীয়া ভাষাৰ পুনৰ প্ৰতিষ্ঠাৰ বাবে যুঁজখন আৰম্ভ কৰিব লগীয়া হ’ল।

উইলিয়াম ৰবিনচনৰ লগত নাথান ব্ৰাউনৰ ক্ৰমে বাক-বিতণ্ডা আৰম্ভ হ’ল। কিন্তু মিছনৰ উৰ্দ্ধতন মহলৰ লগত মতানৈক্য হোৱাৰ ফলত ব্ৰাউনে যুজঁখন আধাতে এৰি ১৮৫৫ চনত অসমৰ পৰা গুচি যায়।

তাৰ পিছৰ সময়ছোৱাত অসমৰ ভাষা আন্দোলনটো চলাই লৈ যোৱাৰ দায়িত্ব লয় মাইলচ ব্ৰন্সনে। ড০ মহেশ্বৰ নেওগ চাৰৰ উল্লেখ অনুসৰি -‘ মাইলচ ব্ৰন্সনে অসমীয়া ভাষা পুনৰ প্ৰচলনৰ বাবে কলিকতাত থকা ভাইচৰয়লৈ চিঠি প্ৰেৰণ কৰিছিল’ ।

তাৰ সমান্তৰাল ভাবে আধুনিক অসমৰ পিতৃ স্বৰূপ আনন্দৰাম ঢেকিয়াল ফুকনেও কলিকতালৈ চিঠি পঠিয়াই থাকিল । কিন্তু সেই চিঠিয়ে বৃটিছৰ প্ৰশাসনিক বিষয়াসকলৰ বিবেচনা জাগ্ৰত কৰাত বাৰে বাৰে ব্যৰ্থ হ’ল ।

ইতিমধ্যে বৃটিছে ভাৰতত বলবৎ কৰা শিক্ষা- নীতি অনুসৰি অসমৰ স্কুলত ইংৰাজী শিক্ষাকো অন্তৰ্ভুক্ত কৰা হয়। বিশ্বৰ ইতিহাস সাক্ষী – প্ৰভূত্ব স্থাপন কৰা জাতিটোৰ স্বাভিমান আৰু ৰাজহাড় ভাঙি দিবলৈ যি কোনো বিজয়ী শাসকে প্ৰথমে আঘাত কৰে পৰাভূত জাতিৰ মেৰুদণ্ড স্বৰূপ ভাষাটোৰ ওপৰত।

‘The Last Lesson’- ত উল্লেখ কৰা ফ্ৰান্সৰ স্কুলত জাৰ্মান ভাষাত পঢ়াবলৈ নিৰ্দেশ দিয়া জাৰ্মান শাসকৰ দৰেই বৃটিছ শাসকেও প্ৰায় সমগ্ৰ বিশ্বত তেওঁলোকে শাসন কৰা দেশসমূহত ইংৰাজী ভাষা জাপি দিছিল ।

তাৰ পৰিপ্ৰেক্ষিতত বৃটিছে অধিকাৰ কৰা সকলো দেশেই তাৰ বিভিন্ন জাতি-জনগোষ্ঠীৰ অনেক ভাষা আৰু ভাষিক উপাদান হেৰুৱালে। অসমে হেৰুৱালে নিজৰ মুখৰ ভাষা আৰু শিক্ষা লাভৰ সুচল বাট।

ড০ আৰ কে বেজবৰুৱা

admin
adminhttps://www.neindianews.com
NE India News is a multilingual news web portal initiated by a dedicated group of journalists in India. Ne India publishes news on the latest coverage on National News, International News, Sports News, Entertainment News, etc. See less
RELATED ARTICLES

LEAVE A REPLY

Please enter your comment!
Please enter your name here

- Advertisment -

Most Popular

Recent Comments