অৰুণাচলত কাম কৰিবলৈ গৈ দুৰ্গম স্থানত আৱদ্ধ মৰাণৰ ১১ শ্ৰমিক
কৰ্মসংস্থানৰ বাবে গৈ অৰুণাচল প্ৰদেশৰ দূৰ্গম অঞ্চলত আৱদ্ধ হৈ আছে মৰাণৰ খোৱাং বোকাহোলাৰ ১১ জনকৈ যুৱক ৷
যোৱা ২ চেপ্টেম্বৰত ঘৰৰ পৰা অৰুণাচললৈ যোৱা যুৱককেইজনৰ সৈতে যোগাযোগ বিচিন্ন হৈ থকাত চিন্তিত হৈ পৰিছে পৰিয়ালৰ লোকসকল ৷
অভিযোগ অনুসৰি মৰাণৰ চিত্ৰ গোহাঁই আৰু নিতু শৰ্মা নামৰ দুজন লোকে অৰুণাচলৰ কোনো ঠিকাদাৰী প্ৰতিষ্ঠানৰ পৰা প্ৰত্যেকজন লোকৰ বিপৰীতে তিনিহাজাৰকৈ টকা লৈ শ্ৰমিকৰ যোগান ধৰিছিল ৷
অত্যন্ত দূৰ্গম অঞ্চলত পথ নিৰ্মাণত নিয়োজিত কৰা খোৱাঙৰ এই যুৱকসকলৰ অৱস্থাক লৈও দু:চিন্তাত ভূগিছে পৰিয়ালৰ লোক ৷ আনহাতে এই যুৱকসকলৰ লগত যোৱা খোৱাঙৰ বাঘতলি পথাৰৰ ৩ জন যুৱকক ইতিমধ্যে উদ্ধাৰ কৰি আনিছে পৰিয়ালৰ লোকে ৷
উভটি অহা যুৱককেইজনৰ ভাষ্য অনুসৰি অৰুণাচলৰ অতি দূৰ্গম স্থানত তেওঁলোকক প্ৰতিকূল বতৰৰ মাজতে কামত নিয়োজিত কৰা হৈছিল ৷ দুৰ্গম পাহাৰীয়া অঞ্চলত কাম কৰা কোনো শ্ৰমিকে পলায়নৰ চেষ্টা কৰিলে অমানুষিক নিৰ্যাতন চলোৱা বুলিও জানিবলৈ দিছে যুৱককেইজনে ৷
ইতিমধ্যে আৱদ্ধ হৈ থকা যুৱকসকলক ঘূৰাই আনিবলৈ পৰিয়ালৰ লোকে মৰাণৰ লোক দুজনক অনুৰুধ জনাইছে যদিও কোনো গুৰুত্ব প্ৰদান নকৰাত উপায়হীন হৈ পৰিছে আত্মীয়-স্বজন ৷
ই বিষয়ে খোৱাং আৰক্ষী থানাত পৰিয়ালকেইটাই অৱগত কৰিছে যদিও বৰ্তমানলৈকে সুফল লাভ কৰা নাই ৷
